السلام عليكم و رحمة الله و بركاته
ضغط + ضغط + ضغط = بووووووووووووو - - - - - ووم
روتين + روتين + روتين = مللللللللللللللللللل- - - - - - للل
في يومٍ من الأيام و بعد ضغطٍ شديد و روتين قاتل، قررنا أنا و أختي المصرقعة أنّا نسوي شيء و اللي فيها فيها ( إن ما طاعك الزمن و إلا أنت طعه << أظنها كذا )
المهم .. احنا عبارة عن أربع نفرات [ أنسه شخبطه " اللي هي أنا " - وناسه " أختي اللي أكبر مني بسنة " - ترنيمة المطر " أختنا الكبيرة " - " أصغرنا " الدلوعة ]
صاحبة الفكرة : وناسه.. مسكينه منذ مبطي و هي تبي تنفذها بس كل مره نقولها طيب و تتأجل السالفه، طبعاً الكل مأيدها..
ذاك اليوم كان السبت قبل الاختبارات بأسبوع الصباح، وناسه رايحه للجامعة تسأل شخبطه: تبغين شي من الجامعة؟؟
شخبطه: لا سلامتك بس مو تطولين ورانا شغل بسرعه ارجعي، و لا تنسين تقولين للسواق يجيب الكراتين، و تأكدي إذا نزلت الجداول و إلا لا؟؟ طيب << هذا اللي ما تبي شي..
وناسه: طيب... مع السلامه بااااااي.
شخبطه: الله معك بااااي.
طبعاً في ذاك الوقت الدلوعة بالمدرسة - الأخت بثاني ثانوي - ما تدري عن مخططاتنا لا هي و لا ترنيمة، أما ترنيمة فجالسه بالصالة تتفرج على التلفزيون لا شغل و لا دراسة - الأخت متخرجة -
عاد طلعت وناسه من هنا و بدأ الجد من هنا، قامت الأنسه شخبطه و شمرت عن ساعديها و بدأت تقسّم الأشياء فتحت دولاب الملابس رتيته بطريقة معينة بحيث يكون فيه مكان
فاضي. و بعدها راحت للدولاب الثاني ( ساس البلا ) و طلّعت كل اللي فيه من مجلات و كتب و شنط و عفش له داعي و عفش ماله داعي. و حطت الأشياء اللي ما يبغونها بالكراتين
أما اللي يبغونها فدخلتهم بالدولاب الثاني، الكتب و المجلات حطتهم بدولاب صغنون عبارة عن أرفف فضته و حطتهم بترتيب و بعد جهدٍ جهيد و كرف طول الصبح يأذن الظهر.
تجي ترنيمة من الصالة تدخل الغرفة كل ملامح الصدمة على وجهها ؟؟؟!!! طـــــــن !!!
تسأل: وش ذي الحوسه؟؟ << قصدها على الكراتين..
شخبطه: لا و لا شي تغيير جو ، كسر روتين.
ترنيمة بشك: تغيير جو..؟؟ كسر روتين؟؟ هين أكيد أنت و وناسه ناوين على شي.
شخبطه: وش دخل وناسه؟؟ وناسه بالجامعة مالها دخل بشي.
ترنيمة: طيب نشوف، على فكرة أذن الظهر و قبل شوي الشغالة حطت الفطور إذا كان بتأكلين معي << أهم شي فطور الظهر.
شخطبه: دقايق و جايه.
الحمد لله صليت و أفطرنا و قعدت شوي أريّح من الصبح أكرف، جت وناسه و الدلوعة و لما دخلت للغرفة علامات الدهشة ؟؟؟ !!! انرسمت على وجهها بس ما علقت و لا قالت شي.
أذن العصر و تغدينا و جلسنا مع أخواني ضحك و سوالف. قبل المغرب بشوي رجعنا للجد. دخلنا الغرفة ( شخبطه - وناسه )و نادينا معنا الدلوعة.
بدينا نفك الدولاب اللي فضيته (ساس البلا ).
طبعاً ترنيمة ما دخلت معنا و ما تدري عن شي هع هع.
وناسه قائدتنا: امسكي باب الدولاب من النص عشان ما يطيح ************************ الكلام لشخبطه، و أنت يالدلوعة امسكي معها عشانه ثقيل.
باب ورا باب.. رف ورا رف.. إلين جينا للشديد القوي الأساسات الخارجية.
ألحين نحتاج مساعدة ما في إلا نقول لترنيمة. من عند الباب شخبطه تنادي: ترنيمة ترنيمة.
ترنيمة: نعم وش تبين؟؟
شخبطه: تعالي ساعدينا نحتاج مساعدة.
دخلت ترنيمة الغرفة وشهقت : يا مجانين وش تسوون؟؟
- لحظة صمت -
تكمل: قلتوا لأبوي؟؟
كلنا: لا..
ترنيمة: منتوا صاحيات من الصبح و أنا قايله ناوين على شي..
شخبطه: شي؟؟ أهم شي يختي ملينا من شكل الغرفة نبي نغير الدولاب مضايقنا نبي نتوسع، وش قيك أنت؟؟ هذا اسمه تكتيك.. المهم بتساعدينا وإلا لا؟؟
ترنيمة: بساعدكم بس أنتوا تفاهموا مع أبوي.
وناسه: طيب بس اخلصي علينا.
الحمد لله ساعدتنا و تمت العملية بنجاح << صدق قومٍ تعاونوا ما ذلوا..
طلّعنا الدولاب برا الغرفة كلنا مع بعض و نادينا الشغالات يساعدونا. خليناه بالممر لين يجي أبوي يشوف له صرفه. طبعاً أخواني الصدمه صاقعه وجيههم..
جاء أبوي من الدوام << جاك الموت يا تارك الصلاة. ناداني سألني: وش ذا؟؟ << يأشر على الدولاب.
بكل براءة: دولاب.... - لحظة صمت - شهيق و زفير... إلخ من الحركات التي تستعيد الأنفاس، هذا الدولاب الله يسلمك زايد مضيّق علينا الغرفة و مجمّع لنا حوسه
دخلنا اللي فيه بالدولاب الثاني. خلاص معاد نحتاجه.
الوالد: طيب " بكل استغراب و أكبر علامات التعجب و الاستفهام فوق رأسه" : مين فكه؟؟
بابتسامة خوف: كلنا تعاونا وفكيناه..
الوالد: دخل غرفته بدون أي تعليق.
أكيد يستوعب الصدمه بقلبه تلاقيه يقول: أشك أن اللي عندي بنات ذول بنات لا مو بنات هذول عمال؟!!!
طبعاً مكان الدولاب حطينا طاولة الكمبيوتر و توابعها و زحزحنا السراير بدل ما كانوا بالنص صار واحد على امتداد الشباك و الثاني على الجدار.
[ للإيضاح .. غرفتنا عبارة عن أربعة سراير كل اثنين فوق بعض. على قولة وحده من البنات أحس غرفتكم نظام عسكري و خاصة أن لون الجدران زيتي معتق و الدواليب بني
غامق] << أبوك يالكآبه..
النتيجة النهائية:
توسعنا و غيرنا شوي إضافة إلى كسر الروتين..
سوينا شي مفيد للصحة و مفيد في الحياة..
صدق من قال الحاجة أم الاختراع..
النهـــــــــــــــــــــــــــــــــــــــاية
^^^
كأني طولتها
إلى لقاء آخر في صرقعة جديدة..
ـــــــــــــــــــــــــــــ
ما بعد النهاية:
لطلب أي مساعدة أو خدمة
ليس عليك سوى الاتصال بنا
و نحن رهن إشارتك..
Tel:
- - - - - - - 01
Mobile:
- - - - - - -055
e.mail: - - - - @hotmail.com
ليست هناك تعليقات:
إرسال تعليق
من فضلك في حال اختيارك (غير معروف)
اكتب اسمك (= ^.^ =)